Hadhaa Ana!

قصيدة "قبل اليوم" لأحمد بن خليفة

2011-02-26T13:59:00.000+01:00

قبل اليوم

http://www.youtube.com/watch?v=-lFN7WVe0sc

قبل اليوم كنا اذا أشرقت العيون ترى رسوم الظلوم تعلو الجدر

و قبل اليوم سمعنا نشيد الوطن ارداه صوت النفاق و من ذا غدر

كنا اذا مررنا جوار الجنود نحني الجبين والقلب يبكي العمر

اخرج من بيتك والتفت وراءك فالرقيب بالعين عن كل حر سهر

وكل جار يكتب بالغدر تقرير جاره فما تدري نفس بأي سجن تمر

مر على المقاهي ملءا بأهلها ثلاث وعشرين عام على نفس الكراسي تصر

أرقب الصبية على الباب تبكي و ما من مجيب يوم علم حرمت اذ بالحجاب تبر

ليس الذنب قلما بالبيت ينسى بل الباب لغير الساترات ممر

عن اليمين جلست في الستين يدها على خدها تشكو الانتظار لمن عبر

لي خمس و السادس مفقود يتيم وعاطل تخرج وطالبان و زواج الاخيرة منه لا مفر

كل ذاك و عتبات البيت تشهد ثمانون دينارا منذ اعوام بالذل هنا تنتظر

لكن ابتسامتها على المحيى رثاء لمن جاوز عجزها فقرا و دينا أمر

قبل اليوم يطلبك الموظف كرها ألفا من الاوراق او حتى حجرا من القمر

او علّه يمد العين قبل اليد و اللسان بكل الوقاحة خمسون دينارا لأسهّل لك ما عسر

فتبا للمرتشين وتبا للعابثين و تب لكل خنوع ما ضاق ذرعا وما انفجر

فاسد هنا امام الباب و سارق هناك على الكرسي

مرتش وراء المكتب والكل سواء

نفاقا صفقوا لصورة الرئيس فوق رؤوسهم اذ عن فسادهم غضوا النظر

و يا شريف القوم ما لك تجزع فالزنزانة بيت من بكل الفاسدين كفر

قبل اليوم يولد الرضيع فيهم غنيا مالكا للبيوت والقصور له مقر

و الرضيع منا ما حق له الحليب

فلأبنائهم كل الحلوى و لابنائنا رؤوس الجزر

قبل اليوم حكم القضاة مسجون والاحرار فيهم نبذوا كما جربى البقر

كل الفساد ذاك و الرئيس ما خبروه مسكين بل غالطوه كذا أمر

في خطاب الظلم قالها بالحزم كل الحزم أن الحر في تونس شر

و ان العجوز يبكي شر

و ان الصغير حجارة يرمي شر

و ان الكاتب اذا عبر شر

وان الفقير يلعن فقره شر

حتى الغني ما رضى قسمة جهده مع الطغاة شر

بل كل الشعب كل الشعب على الشعب خطر

اما اهله و زوج الفساد ليلى هم الحماة هم الحماة هم الخير هم المطر

كما ناشدوك و لم يستحوا شعبهم نفاقا و تخوينا لللاجئين و من بقوة الجند هجر

يا بلدي لك الدعاء من كل العباد ليلة الخميس دعاء الصابرين هز الحجر

دعوة الحق نساها كل جبار بيد الملاك يحملها وقت السحر

ما ردها الله و ان بعد حين أجابها للشعب يوم استجاب القدر

كذا الشعر في وطني دعاء الساجدين تونس ليلك ينجلي و قيدك ينكسر

هبوا رجالا نساء بوجه الرصاص ألفا بعد ألف تجمعوا مد البصر

حبسوا أنفاس القوم أمام الشاشات كل العيون ترقب متى الجبار يندحر

هرب الظلوم و من كل صوب ترى طفلا أمام شرطي عجوزا وراء جندي قنّاص على السطح يرقب ثم يقتل و صوت عقر

ارحل عن و جودنا ارحل عن بلدنا مللناك رئيسا بل كنت سارقا مللنا ذا الوجه العكر

هرب الظلوم يا شعبي و ما هرب فالله ما أهمل دعوة مظلوم بكى تحت الشجر

لعمري ما أهداك هروبا بل ذاك طريق وعر

من قرطاج تسلكها الى الحرمين مأواها و الكل يدعو عليك متى مأواك سقر

الى العجوز على عتبات البيت

الى المسجون الى المعذب الى من به الظلوم مكر

الى الباكيات يوم الدراسة منعا بالحجاب تأملوا

الى العاطلين عن المقاهي سنين العمر

هرب الظلوم كما السابقين لكن عبرة للحاكمين فهل من معتبر

أن الشعب سيدكم وانتم عبيد و من جالد الناس كمن يسقي الشجر

يسقيها ظلما فتعلو شدادا فلا يقوى الصعود ظلوم اذا الغصن كبر

الى الداعين في اليوم خمسا بلادي عبر

من كان منكم للهاربين عبدا فالهاربون هنا ماضي الخبر

و من كان لله عبدا و للشعب جندا فذا يوم العز قد حظر

فشمّر عن الاذرع الصادقات كبّر بها أن صعّد حديدا و مدّ الحجر

قد ولى عهد الجالسين و الحرية تونسية كما قالها كل البشر

كان التاريخ يكتب عمرنا ذلا و اليوم نكتب التاريخ فوق السطر

أنا لا نرضى بغير العز خبزا ومن خالف العز منا فذاك مكر

ومكر الغبي كمن يرتجي حياة على الارض حين قبر

عاشت تونس حرة عاش الشعب سيدا

اليوم تبدأ هنا الحكاية نرويها للصغير عند الكبر

أحمد بن خليفة

قصيدة: خَرجتَ جـــلاَّدًا للشَعبِ

2011-02-20T13:13:00.005+01:00

قصيدة: خَرجتَ جـــلاَّدًا للشَعبِ

من أجمل ما قيل في بن علي للشاعر
أحمد بن خليفة

https://www.facebook.com/video/video.php?v=181114708598518

خَرجتَ جـــلاَّدًا للشَعبِ سَاقِيًا كأس ظُلمٍ للنَّـــاس هَبَت تُقَاوِمُهْ

مَا رَأى يَومها بَنفسجِيُُّ علاَ صوتُه بالهتافِ يُجاملُهْ

ثلاثٌ وعِشرُونَ في العُمرِ صَبرًا إِلَى متى تَعُدُّ الزَّمان تُطاوِلُهْ

أَمَا علمتَ أَنَّ للجَبَّارِ يَومًا إذَا جَاءَ مَا عَادَ الزَّمانُ يُطَاوِعُهْ ؟

إلَى المُسْتَبدِّ بِخلقِ اللهِ عِبرةٌ ملوكِ الأرضِ مضتْ للشَّعبِ تُجَادلُهْ

راحتْ عُروشها هباءًا حينَ قامت لصَبْرِ النَّاسِ تُنَازِلُهْ

وَمَا أنتَ مِن فِرعَونَ سِوى فَأرٌ بِفرقَةِ الجُنْدِ تُسانِدُهْ

صَبَغتَ شَعركَ بِالظُّلمِ مُخظبًا جَبانٌ على النِّساءِ سَرتْ مَراجِلُهْ

عِصيًّا وَغَازًا فِي وُجُوهِ الثَّائِرِيينَ رَصاصُ ظُلمِكَ فِي الصُّدُورِ تَنَاثُرُهْ

شَعبي سَرقْتَ وَعَينُ اللهِ سَاهِرَه..طرابلسيٌّ يَدٌ تَحميهِ وَ يَدٌ أُخْرى تُنَاوِلُهْ

مِنْ مَالِ الجَائِعِينَ بَنَوْ قُصُورًا وَلاَ دَامَ بيتٌ بِالظُّلْمِ مُقَاوِلُهْ

عَسْكَريٌّ مَسْرَاكَ فوقَ الرِّقَابِ وَحَلاَّقةٌ عَن قُوتِ الفَقِيرِ تُرَاوِدُهْ

حَالُنَا مِن تَقَارِيرِ اللِّئَامِ مَوْصُوفْ.. خِبْتَ رئيسًا قَرَأْتَ وخابَ ذَا حَامِلُهْ

هَمَّازُونَ علَى الفُتَاتِ مَعاشُهُم وكلُّ همَّازٍ إلَى النَّارِ مَصَائِرُهْ

أمَا خَبّرُوكَ عَنِ العَجُوزِ يَنْعَى دَوَاءًا مَفقُودًا بالذُّلِ يُحَاصِلُهْ

أمْ خَبَّرُوكَ عنِ اليَتِيمِ مُشَرَّدًا.. أمَا كَفَاكَ بالجَلدِ فِي سَجْنِكَ عَائِلُهْ ؟؟

شَبَابٌ عَلى قَوارِبِ المَوتِ تَحْيَى حِينَ عَزَت للشُّغْل مَقَاعِدُهْ

لَيْسَ عَجْزًا.. بَلْ العَدلُ مَفْقـُـودْ، فَسادٌ مَالَتْ بالثُّقلِ جَدَاوِلُهْ

قُلُوبُ الله مِن جَبَرُوتِكَ مَلَّتْ حِينَ سُبَّتْ بِالظُّلْمِ مَسَاجِدُهْ

أمَا عَدَدتَ جُثَثَ الهَالِكِينَ وَرَاءَ قُضبَانِكَ تَهوِي مَجَالِدُهْ

كمْ عَذَّبْتَ شَبَابًا جُرْمُهَا رَكعة صُبْحٍ أَمْسَيْتَ بها تُسَائِلُهْ

الله سَائِلٌ عنها كتابكَ فبما تُراكَ عَن كُلِّ نَفْسٍ تُجَادِلُهْ

دَعْ عَنْكَ تَقْرِيرَ الكَاذِبِين واسْمَع.. فَاسمع عَنِ الفَسَادِ غَصَّت مَصَائِبُهْ

صَخرُ ٌفَاقَ قَارُونَ كَنْزُهُ لِصٌّ فِي حِمَى الجَّلاَدِ يُصَاهِرُهْ

أبُو النِّفَاقِ والزَّيْتُونَةُ حُجّتِي كَلاَمُ الله لِصخرٍ سَتَائِرُهْ

رُءُوسُ الفَسَادِ نَاسبُوكَ وَ أُختُهُم بِئْسَ الزَّوجُ أنْتَ وَ بِئْسَ نَسَائِبُهْ

وَرَاءَ المَكَاتِبِ مُرْتَشُونَ مَا شَبِعُوا وَعَلَى الجِّدَارِ رَسْمُ وَجْهِكَ عَلَتْ مَحَامِلُهْ

أطلقتُ فِيكَ لِسانِي مُشرِعًا وَقلبِي لكُرهِكَ جَدَّت عَمَائِرُهْ

شُرْطِيٌّ بِخَيطٍ عَلَى أَكْتَافِهِ منّي أنا ابن البِلاَدِ حلَّتْ مَسَاخِرُهْ

ادفع خمسًا أو عشرًا تَمرّ، فَإن أَبَيتَ سَرَتْ عَلَيكَ مَكَائِدُهْ

سِنِينًا طِوَالاً عَلَى المَقَاعِدِ نَنْحَنِي بِأقْلاَم الجِدِّ تَحْلُو شَهَائِدُهْ

وفي الأَخِير.. وَزِيرٌ وشعبةٌ عَيَّنُو القَرِيبَ وَ مَن كَثُرَتْ مَأكِلُهْ

في بِلادِي نِفاقٌ رَمْزُهُ سَبعةٌ مِنْ ثَلاَثٍ وَعِشْرِينَ حَولاً عَلى الأَبْرِياءِ مَصَائِبُهْ

للفَاسِدِينَ جِنَانُ قَرْطَاجَ وَمَا حَولهَا لَهُم بِكّلِ الحَرَامِ تَحْلُو جَنَائِنُهْ

والنَّاسُ لَهَا الله كَذا يَقولُون وَمَالُ النَّاسِ شَدّتْ مَرَاضِعُهْ

فَلا َعِشْتُ إنْ عِشتَ يَومًا وَالموْتِ فِي حُكْمِكَ تُرْجى شَدَائِدُهْ

وَالذِّي رَفَعَ العَرْشَ وَأَعْطى الحَيَاة مَا داَمَ خُبزٌ بِالذُّل خَمَائِرُهْ

إمَّا حَيَاةٌ بِالعِزِّ لِشَعْبِنَا وَإمَّا الظُّلم بِعَزْلِكَ تَفْنَى مَسَائِلُهْ

يَا ظَالِمًا لخلقِ الله لَكَ عِبرةٌ إذا ما الزَّمَانُ حَلَّتْ دَوَائِرُهْ

لَوْ دَامَتْ لَكَ العُرُوش يومًا لدَامَت لِكُلِّ السَّابِقِينَ وَسَائِدُهْ

لَكِنَّ المَوتَ فِي النَّاسِ وَاجِبْ... فَلْ نَرَى مَا تُرَاكَ بَعْدَ المَوتِ حَامِلُهْ

اليهود التوانسة

2011-02-14T16:34:00.003+01:00

اليهود التوانسة

أهلا بيكم

عندي برشا نفكر في كتابة التدوينة هذه, لكن وقت شفت التصويرة هذه أحسست بأن ثما مشكلة كبيرة في الأفق

أول حاجة بحكم كوني من مدينة فيها عدد قليل من اليهود فاني علاقتي بيهم محدودة, لكن هذا ما منعش من أني نسمع منهم عدة تشكيات, منها ما يعنيه البعض منهم من جهل عديد المحيطين بيهم و زادة استغلال نظام بن علي ليهم باش يبان قدام العالم انه حامي الاقليات و انه في تونس ثما تسامح, لكن الاستغلال الفاحش من طرف بن علي و نظامه عمل عدة مشاكل, منها انه جعل اليهود التوانسة بين المطرقة و السندان, من جهة نظام بن علي و المقربين منه من الطائف اليهودية في تونس اللي كانت مساندة لاسرائيل بشكل علني أو بشكل سري وفي الجهة الأخرى ثما مجموعة من الناس اللي تشوف كل يهودي على انه غير مرغوب بيه رغم ان اليهود عندهم جذور تاريخية كبيرة في تونس و وجودهم كان قبل دخول الاسلام و الحاجة الثانية هي أن العديد من القبائل التي اسلمت مع الفتحات الاسلامية كانت من اليهود و ثما زادة مشكلة تتمثل في عدم قيام اليهود التونسيين بالدفاع عن انفسهم عبر عدم القبول بتصريحات القيدات الدينية متعهم اللي ساندت بن علي كيف مناشدة كبير حاخامات تونس بن علي لاعدة ترشيح نفسه و كذلك رفض الاقصاء اللي انتهج ضدهم من طرف بن علي و قبله برقيبة و على سبيل المثال, اليهود ما يعديوش الخدمة العسكرية و ما يخدموش في الأمن و ما ياخذوش وظائف هامة في الدولة, و هذا اقصاء و ظلم في حقهم و في حالات أخرى ما كانوش ياخذو حقهم في حالة وجدوا رواحهم في قضية ضد شخص غير يهودي و ينجم يأكد كلامي شكون من حلق الواد و عاصر عهد برقيبة اللي أدى الى هجرة العديد منهم خاصة اذا علمنا أن الموساد و غيره من المنظمات كانت تحاول تستقطبهم باش يخليو تونس ... وكانت هذه سياسة برقيبة اللي اليوم عدة وثائق تبرز انه كانت له علاقات مع إسرائيل حتى من قبل الاسقلال قبل ما يوصال بن على نفس المنوال و ان كان حصل تحسن في عهد بن علي حيث كانُ ينصفون أما القضاء

البعض يستند على الاية :" لَتَجِدَنَّ أَشَدَّ النَّاسِ عَدَاوَةً لِلَّذِينَ آمَنُوا الْيَهُودَ وَالَّذِينَ أَشْرَكُوا ۖ " لمعاداتهم , و ثما شكون يستند في رايه ضدهم على انهم امتداد للاحتلال الاسرائيلي في تونس بحكم ان العديد منهم يقوم بزيارات منتظمة للأراضي المحتلة

البعض يحاول انه يجعل الدين هو الاساس اللي يقيم عليه الفرد, يعني اذا انت مسلم فانك خير من طلعت عليه الارض و اذا انت غير مسلم فلك ان تتخيل ما قد توصف بيه, لكن كملة الحقّ لازم تقال وهي اني رأيت يهودا أشد شهامة من بعض الذين ينسبون للاسلام و ان كان البضع قد اطال اللحية كيف اللي شاركو في اسطول الحرية لكسر الحصار على غزّة, شفت شكون يقيم على انه سلفي/صوفي/أو حتى مجرد انسان يصلي لكن هو مستعد لبيع من هم من ملته باش يقعد بعيد على التتبعات و شفت شكون مسيحي لكن مستعد انه يساند المستضعفين بغض النظر عن الدين كيف عدة منظمات مسيحية كانت تتبرع لمنظمات اسلامية كيف اللي صار من منظمة أمريكية وقت قدمت عدة مليين من الدولارات لإسلاميك ريليف – منظمة اغاثة اسلامية- اللي أسسها هاني البنا

و هنا نجم نذكر عدة منظمات انسانية كيف الصليب الأحمر و أطباء بلا حدود و غيرهم اللي تقدم الغوث لاي دولة بغض النظر عن الدين, و شكون من منظمة نطوري كارتا – حرسا المدينة- اللي هي من اليهود الرافضين لفكرة انشاء دولة لليهود و كذلك المساندين للقضية الفلسطينية و للعرب, لازم زادة نقلول كلمة حقّ لانه الحقّ أحق أن يتبع

لكن هذا ما يمنعش ان هناك عدة منظمات عكس كل ما ذكر لان في الدنيا ثما الباهي و ثما الخايب, و هذا ما يعطيناش الحق باش نقصيو شكون من التوانسة على خلفيتهم الدينية, أنا وقت نصلي في الجامع و يجي شكون في دولة غربية و يحتج قدام الجامع اللي نصلي فيه و يحب يوصل رسالة الى طرف ثاني فاني وقتها نحس بانه يستفز فيا و أنه يعادي فيّا فما بالك اذا كان اللي يقوم بالشيء هذا تونسي و ولد بلادي, وقتها تلقى ان التصرفات هذه ماش تعمل ردت فعل في اتجاه سلبي من قبل اللي صارتلهم, و اذا ثما شكون يحب يوصل رسالة لاسرائيل أو غيرها علاش ما يوصلهاش بشكل مباشر؟ و علاش ما يتضاهرش قدام الدول اللي تساند فيها و تعتبرها ولالية من ولياتها؟ و زيد على هذا, التصرفات الصبيانية هذه في الوقت هذا بالذات ماش تحل علينا حرب, بحيث ماش تولي الدول الغربية تطالب تونس بحماية الاقليات و الله اعلم باش ممكن يزيدو يطالبو, و ابسط مثال هو المشهد المصري اللي أدى تدخل الغرب فيه الى زيادة الاحتقان الطائفي اللي الحمد لله خمد في اثناء الثورة المصرية و زادة ثما المثال الشهد السوداني اللي أدى الى استقلال الجنوب و زيد معاهم مشكلة دارفور اللي ماش تزيد يقسم السودان, رغم أن كل دولة عندها خصوصيات أما أي تدخل من شئنه أنه يعقد الوضع أكثر و يجعل الوحدة الوطنية شيء من الماضي

اذا نذكر اليوم اليهود التوانسة فان فيهم شكون يوالي اسرائيل كيف ما ثما شكون من العرب يطالب بالتطبيع, أما ثما زادة شكون منهم من الي يساند القضية الفلسطينية منهم

جورج عدّة

الذي عرف بمعداته لاسرائيل و مساندته للبني جلدته من العرب و اللي كتب نص : تـحرير فلسطين الكامل وعـودة كلّ اللاجـئيـن حـق دائم وغير قابل للتصـرف

http://www.facebook.com/topic.php?uid=27110222277&topic=5221

في أوج الحضارة الأندلسية , و الحضارة البعاسية, كان الانسان يقيم بعلمه و بما يعرف لكن للاسف اليوم ثما شكون يحب التقييم يصير بصورة أخرى و زيد يحب يعبث بوحدة هذا الشعب

في الختام, الدين مسألة شخصية و حتى انسان ما عنده الحق باش يقصي شخص على اساس الدين, أنا مسلم و هذا أمر يخصني, هو مسيحي أو يهودي أو لا دين له, هذا أمر يخصه و نهار أخر , ربي هو اللي ماش يحاسب موش أنا اللي ماش نحاسب الخلق على دينهم أو ملتهم , و كيف ما نرفض أنه يجي شكون يستفزني فاني زادة نرفض الاستفزاز لاي طرف مهماك كان دينه

مع سيادته

2010-12-20T13:19:00.000+01:00

مع سيادته

اليوم هو يوم خاص شوية, و ان كانت بداييه اعتيادية, كيف العادة نفيق 6:30 و نجهز نفسي و نخرج للمحطة بكري... لا ثما شوية تغييرات, لأني السناء صارتلي برشا حوايج ف معادش نفيق بكري و ليت نفيق 6:50 , و نجهز نفسي بسرعة و نهبط جري للمحطة باش نوصل على الكار اللي ولات تفوتني برشا مرات في الجمعة, الله غالب وليت نفقد في النشاط و النفحة متع القراية بعد ما صارت معيا برشا فزات كرتهني في روحي, بعد يوم شاق من الدراسة و متابعة الأستاذي اللي في حلات كثيرة يكون أبخل مني و أقل نفحة باش يقري نورح تاعب, و لأن الجودة في قطاع النقل العمومي شيء مشهود بيه عالميا كيف برشا حوايج أخرى, ما نتعطلش برشا في العودة الى البيت , في أقصى الحالات ساعة و نصف ... روحت و دخلت الدار, تعديت الى غرفتي و حليت الأورديناتور , و مشيت للكوجينة باش نعرف أش ثما غداء و عشاء, عذرا, لآني موش ديما نتغدى فاني نقوم بالتفرغ لهم جمع و قصرا

و للأسف ميزال مطابشتش الماكلة, الحاجة الحلوة أني السناء عندي شكون يطيبلي موش كيف العام اللي فات ... العشاء ميزال يبطى برشا, و أنا تاعب , لازم نرجع للبيت نحط موسيقى و نتفقد الايميل, و نرد على ما يردني, الحكاية موش صعيبة برشا لكن في بعض الأحيان منحبش نرد على الطرف الأخر لأنه اما يقلق فيا أو يحرجك بشيء يفوق طاقتك, ما نطولش بالي برشا و نحاول يكون ردي هادئ و أجيب كل شخص على حسب حاجته و على حسب أسلوبه في الحوار, بعد ما كملت طفيت الضوء و مشيت استلقيت على السرير مستمتعا بأغنية " حيرت قلبي معاك بصوت فضل شاكر ", الغناية حلوة, و كثيرا ما أجد نفسي في عالم أخر معها, لكن سرعان ما رن الهاتف, مديت يدي متثاقل فوجدت سيادته يتصل, انتفضت بسرعة و جف ريقي و بدأ قلبي يخفق بقوة... ما خليتوش ييستنى برشا و جاوبته

هذا أنا : أولو, احتراماتي سيّدي

سيادته 2 : أهلا بولدي , شنحوالك يا هذا أنت؟

هذا أنا: الحمد لله بخير و نعمة, شيء يفرح أن نسمع صوت سيادتكم

2 : فاش تعمل توّا؟

هذا أنا: ميزلت كيف روحت و فاضي , كان تحبو حاجة أنا في الخدمة

سيادته: باهي برشا, أيا تعمل قهوة؟

هذا أنا: أكيد, امتى؟

سيادته: توّا كانك فاضي

هذا أنا: فاضي فاضي

سيادته: باهي ملاّ نصف ساعة و تلقاني قدام الدار نستنى فيك

هذا أنا: الله يبارك, شكرا سيدي

سيادته: في أمان الله

مشيت جري للخزانة نفلت فيها, و نشوف نلقاش تبديلة حلوة للمناسبة السعيدة, تي شكون يتصور أني ماش نعمل قهوة مع سيادته شخصيا

حليت الخزانة و بديت نلوج على تبديلة باهية, جبدت التريكو الأول و اذا بيه ريحته بالعرق, لبسته في نهارين سخان و وقت نحيته ما رميتوش في بيت البانو باش يخسلوه, مشكلة جبدت واحد أخر جديد أما طلع مسخ بالمرق متع المقارونة و ما خليتهمش يغسلوه, ملاّ كبسة أش ماش يعديها, تذكرت أن عندي كوستيم جديد لبسته مرتين أكاهو, مرة في عرس شخص عزيز و مرة في اجتماع مهم جدا, مشيت نلوج عليه فاذا بيه كما تركته منذ شهرين, جبدته و سميت باسم الله و لبسته و أنا نلوج على كرفات تخرج عليه, تذكرت أن ثما كرفات عندها عامين من اللي تشرات و ما تلبستش, مشيت نفلت في القجرات و نلوج عليها, القجر الاول ما فيهوش, الثاني مافيهوش, بكلهم ما فيهمش, الوقت قاعد يمشي و أنا مانيش حاضر, و اذا بالتلفون ينوقز من جديد, انه سيادته يتصل شخصيا لكن قبل الوقت, ب15 دقيقة, هزيت عليه و قلت ان شاء الله خير

هذا أنا: ألو

سيادته: تي وينك ؟ هاني نستنا فيك قدام الدار

هذا أنا: دقيقة وحدة هاو جيت

خرجت جري لبست الصباط و بليته بترف ماء باش يولي يلمع بحكم أنه معادش وقت باش نعمله ضربة سيراج, و رميت يدي على كرفات كحلة مش مستعملة برشا و ربطها و هبطت جري

حليت الباب فاذا بسيادته في سيارته المرسيدس السوداء الفاخرة, كاد أن يتوقف قلبي و أنا أرى كل من في الحي يحدق فيّا, توجهت للباب الخلفي الأيسر للسيارة و قام السائق بفتحه حتى اذا ما ركبت أخرلقه من فوره بهدوء حتى لا يزعج من في السيارة و الناس تراقب من بعد و هم يسألون : هل أصبح هذا أنا شخصّية؟ أم أنه أصبح من الواصلين؟

و قدأ بدأ كل واحد منهم يحاول معرفة من في السيارة لكن لم يفلح أحد منهم في ذلك, خاصة و أن الزجاج معتم مما يجعل الأمر مستحيل

ما ان ركبت و سلمت على سيادته, حتى مد يده ليصافحني, فارتبكت ومددت يدي و صافحته و يدي ترتعش من شدة الرهبة, فاني الأن أجلس الى جانب سيادته

ما ان جلس السائق أما المقود و انطلق و الناس تحدق و قد بدأ حديثهم و أسلتهم عن ركاب السيارة المرسيدس السوداء تبان من خلال تحديقهم و محاولة رصد الركاب تشعرني بالحرج

سرعان مانطلقت السيارة و صرنا خارج الحيّ و أنا جالس الى جانب سيادته و هو يسألني عن حالي و حال أهلي و حال دراستي, و أنا أجيب و أحاول أن أخفف من توتري

انطلقنا الى المنطقة السياحية حتى اذا وصلنا الى أحد المركبات السياحية من فئة الخمس نجوم توقفت أمامها السيارة و سرعان ما همّا ثلاثة شبان في الثلاثين من العمر و طوقوها و قام أحدهم بفتح الباب لسيادته فيما قام السائق بفتح الباب لي, أحسست حينها ببعض النشوة بحكم أني مرافق لسياته و قد بقي من في الشارع يحدقون غير مصدقين لما تراه أعينهم

دحلنا و جلسنا في طاولة بعيدا على النافذة و بجزء منعزل من المركب تم تخصيصه لمضيفي فكان أقرب الجالسين الينا يبعد ما يزيد عن خمس طاولات و يصفصل بيننا و بينهم بعض من العناصر المكلفة بحمايته مضيفي

جلست و جلس مضيفي و بادرني بالسؤال عما أود شربه فقلت شاي أخضر لو سمحت و كان لي ما طلبت مع بضع حبات اللوز في كأس من الكرسيتال الراقي, المخصص عادة للشخصيات الهامة اللذين يقومون في هذا المركب

أما سيادته فقد أثر أن يشرب كأس من الماء المعدني

ارتشف قليل من الشاي أما هو فقد شرب بعض الماء ثم نظر اليا وقال : هل تعلم لما أنت هنا؟

شهقت شهقة و كادت الدماء أن تتجمد في عروقي, و بدأ ألف سؤال يجول في بالي: هل كتبت شيء أزعجه؟

أجبت بعد جهد جهيد في جمع الكلمات و البحث عن أسلوب محترم للتعبير يناسب مقاهم سيادته : عذرا لكن أجهل السبب

تبسم و قال: أحب أن أعرف عن أحوال شعبي فقد صار من حولي لا يوصلون لي حقيقة ما يجري و لا أسمع منهم الا كل مديح و ثناء

هذا أنا : عذرا؟

سيادته : أخبرني عن أحلامك

حينها هدئ قلبي و قلت هذا أنا : حلمي ياسيدي أن أغادر هذه البلاد الى أمريكا

قاطعني قائل : و هل يحلم الحر بفراق وطنه؟

فقلت : سيدي ان الشباب و أنا منهم يحلموم بالهجرة, فمن لم يسعه أن يتقدم الى السفارات الغربية و له ما يسمح له بالهجرة اختار الحرقة بحرا أو برّا, و ما كان البعزيزي الذي انتفضت له سيدي بوزيد الا يحاول تجربة الحرقة برا بعد أن صفعه عون التراتيب البلدية لانه يحمل شهادة جامعية و يشتغل في مهنة أقل من مما تسمح به شهادته

سيادته: لا تقلق سيحاسب المعتدي و يعاقب عنو التراتيب و سنهتم بالجهة وننميها

قاطعته قائل : سيدي, اعذرني ان أزعجتك فيما قلت

سيادتته: أكمل , أخبرني عن أحلامك. لما تحب الهجرة؟

هذا أنا: سيدي, في وطني يخون الأمين الذي لا يملك صك ولاء سياسي لأحد الأحزاب, و يصدق الخائن الذي لا ينفك عن التصفيق للمتملقين, سيدي لقد أبيت على نفسي أن أكذب أو أنافق فصرت فرسية لمن لا يعرف الحق من الباطل

سيادته : قلي على بقية أحلامك, تحب سيارة؟ و بيت مثل كل الشعب ؟

هذا أنا: سيدي لقد تراجع أحلام بقيت الشعب من الحلم بالسيارة الى الحلم بالنقل الجماعي المحترم, و من البيت الفخم في حي من الضواحي الراقية الى مجرد بيت في مدينة هادئة لا تسمه فيها ثلب و لا كلام بذيء حتى و أنت في عقر دارك, و لا ترى قوارير الخمر المهشمة على أرصفة الشارع, سيدي يحلم الشعب ببضع الأمان و العدل

تغير وجه سيادته, و لم أضع الوقت في اكمال حديثي : سيدي, هل تعلم أن في هذه البلاد لايمكنك ان تقف أما أهل النفوذ؟ هل تعلم أن البعض يتصرف في كل شيء كما لو كان بيت أهله؟ اذا رضي على شخص فقد فتحت له أبواب الجنان في الارض, لا يهمه سواء كان يأخذ الأرزاق على حق أو على باطل, لكن اذا شاء أن يفعل أي شيء, ما عليه الا أن يقول للشيء كن فيكون, و اذا غضبو على شخص لا يهم سواء كان عام أو جاهل, سواء كان من أهل الحق أو أهل الباطل, سواء كان "خاطيه" أو من الفئة المارقة على القانون, فانهم يحلون حياته الى جحيم

سيدي : أحلم بالهجرة الى حيث يوقر العالم, و حيث العيش الكريم, و حيث العدلّ, هل سمعت عن من يضرب و يجوع و يمارس في حقه الظلم لأن أحد أقربائه لا يتنمي الى حزب سياسي معين أو لأنه يعرب رفضه لفكر أو أنه أبدى تعاطفه مع شخص و نشر عنه أي مقال؟ سيدي اعلامنا لا يعبر عنّا, فالجرائد تمتلئ بالغث من الأخبار و الترهات, و القنوات الخاصة لا تحتوي الا بعض المكبوتين جنسيا الباحثين عن الجنس و الناشرين لأفكار منحلة و شذوذ بحجة التحرر... سيدي , ان ما تشاهده في نشرة الأخبار أبعد ما يكون عن الحقّ, انه الزور و البهتان, انك تشاهد أكاذيب و تلفيق للأخبار

احمر وجه و زاد صدري ضيقا و قلت : سيدي , أعلم أن ما أوله لا يسر لكن هل تحس بما نحس به؟ هل تحس بأننا على مشارف الهاوية؟ هل تحس بأن الوضح يزداد سوء ؟ هل تحس بنا أما أن عمار 404 يحجب عنك الانترنات و لا تصلك الفيدوات عن الجور و الضلم؟ أما أن من حولك لا يوصلون لك واقع الأمر؟ سيدي هل تجهل هذا ؟

تعكر المزاج و تشنجة الأعصاب و فجأة فتح الباب و سمعت صوت ينادي : يا هذا أنت, فيق العشاء حاضر, هيا يعيش بابا

تبا انه مجرد حلم اخر و ليس بواقع, كم وددت لو أخبرته في أرض الواقع على الكثير, أم تراه يقرأ ما نكتب و يسمع ما نقول؟

لقاء مع عامل بطاحونة

2010-10-31T01:06:00.000+02:00

لقاء مع عامل بطاحونة

ميزال ساهر الليل طويل, و مجاهش النوم, قاعد يتقلب في فرشه, يخمم, و يلعن في الشيطان, حكّ راسه, زاد تقلب, بدل من الوضعية, و باقي شيء, حط المخدة على راسه, نحّها, و النافع ربيّ

طار عليه النوم كيف العادة, على خاطر عنده برشا موش قاعد يقدم في مقلات و رئيس التحرير يحبه يجيب حاجة يعبي بيها الصحيفة متاعه, و السيد الكريم, صحفي

صحفي من جامعة صحافة بودورو, اللي ما تستفيد من الصحيفة الا أنك تمسح بيها بلار و الا فترينة بالاجاكس,

حكّ راسة, دخلّ صبعة في خشمه و بدأ محاولة للبحث عن بعض الأمل هنا و هناك

تفكر بعدين أنه ما سكرش الأورديناتور متاعه,

مشاء باش يسكره, و قبل ما يخرج من بيته تفكر أنه جاع و ما تعشاش بالقدى تعدى على الكوجينة ما لقاش فيها أي شيء يتاكل, حل الثلاجة و لقاء شطر كعبة قارص و قرورة فيها سائل مجهول , نسى أش حطّ فيها

رجع للصالة, جبد الكرسي و قعد على الطاولة و حرك الفأرة باش تحل الأورديناتور, مشاء كيف العادة تفقد موقع فرنوس براس و معاهم رويرترز و سي أن أن, و زاد تعدى على البيبي سي, يلوج على أرتيكل يكرفه, و يكتب عليه "وكلات" فصحافة بود ورو تحترف الــ" نسخ-لصق", بعد مشوار طويل, تعب من القراءة و أمام عجزه على أن يأتي بمقال, أو حتى ينافس زملائه اللي هابطين على المقلات كرفة , أيقن بأنه هالك لمحالة, و أن عرفه ماش يمسح بيه القاعة, ضرب راسه, و قال: نعن بو العيشة الكلبة

الدولار طايح, و مثماش مهرجنات على الأقل العبد يسلكها في دخول بلوشي و هانا يكتب سطرين يعدي بيهم الوقت, ياخي هوّا يكتب في النويورك تايمز و الا في لوموند ديبلوماتيك باش تحرص الجريدة على مستوى المقلات و الا على السبق الصحفي؟

حل الفايس بوك, بدأ يلوج على تصاور البنات, يلقاش بنية تعجبه و الا ترضى بيه, تعدى على القائمة اللي قبلو طلب صداقته, على خاطره كل ما يشوف أنثى الا و ينط على البروفيل متعها و يحاول يزيدها للقائمة متاعه, لدرجة أن عنده في القائمة أكثر من 1000 فرطاس متخبي وراء تصاور بنات سارقهم و معاهم بعض اللي تلوج كيفاش تزيد في قائمة المعجبين بيها

بالصدفة تعدى على أرتيكل متع شخص خدام على روحه أما في الليل يعمل ضريبات فايس بوك, شخص خدام على روحه

الخدمة موش عيب و خدمة النهار ما فيها عار, حتى كان جاء فيها شوية تعب زايد و الا ضربات على القفاء من عرفه, و ساعات يكون في الخدمة شوية وسخ, و الوسخ أنواع, ثما وسخ يمسخ الدبش و بعد ما تغسله ينضاف أما تقعد الريحة, و ثما اللي كان تنقع الخدام في الجفال عشرة سنين يقعد مسّخ, المهم, بعد ما تأمل الأرتيكل اللي لقاه كيف العادة و العوايد قعد ازدادت حيرته, لأن الأرتيكل فيه عشرين جملة أما نفس اللي تكتب أمس, و قبل نهارين نفس الشيء, و قبل جمعة و قبل شعر و قبل عام, مثما شيء يتبدل, كله نفس المحتوى أما الصيغة تتغير, الترتيب متع الجمل و الأفكار يتغير, الله غالب معادش ثما الصحاح اللي يكتبو في الجرائد و موش معروفين باش يسرق أرتيك و يزيد اسمه و يقول هذا من عندي

بعد تأمل للخدّام, قرر أنه يعمل عليه أرتيكل, أش خير من أرتيكل يحكي على الطبقة الكادحة, خاصة أن الأخ خدام على روحه, فهو عامل في طاحونة, و ما أدراك ما ا الطحّان, يأخذ أكياس القمح الصلب و يفتحها و من ثم يضعها في الطحونة لينتج الطحين الراقي, طحين ينافس أجود الأنواع العربية

هو صحيح طحّان, أما يفهم فيها الصنعة, و هذا علاش الصحفي يحب يزيد يوثق بيه صلته, يدبرشي منه خبزة بلوشي, الله أعلم على الزمان

بعثله رسالة على الفايس بوك و قلته :

"خويا , العامل في طاحونة, بربي عندكشي 5 دقائق للقاء صحفي, ؟"

السيد "عامل في طاحونة" ما صدّق, تي يديه شققت من شدة الجهد اللي يبذل فيه, و كل نهار يروح و دبشه أبيض تقولش عليه عبيثة من الطحين اللي يلطخه في الخدمة, و زيد يروح متقلق من شتائم الحرفاء, أول ما تلقى الرسالة, بعث للصحفي النومرو متاعه باش يطلبه, و كانت العملية

الصحفي: خويا نحب نشكرك على قبولك للقاء,

الخدام على روحه: العفو – عامل فيها مثقف, أما هو يمثل , عنده عشرة سنين يشعل في الشموع في ولي صالح قريب لدارهم باش يجي شكون يعبره- مرحباء بيك في كل وقت

الصحافي: خويا كان تعرفنا بروحك

الخدام على روحه: شاب – ممكن ثما شكون يتوقع منه حاجة أخرى – في مقتبل العمر, ولد عائلة و متربي برشا, عندي دار فيها 3 بيوت و صالة و كوجنة و بيت بانو

بدا الصحفي, يحس بأنه عمل غلطة, أما مش مشكلة المهم صحافة بود ورو تعمل اي ارتيكل و يهبط في الجريدة

الصحفي: باهي باهي, سيب علينا من حكاية الدار و ربي يجيبلك بنت الحلال باش تخطبك, أسمع, أش تعمل في الدنيا, نعروف أنك خدام على روحك, أما كان تزيد تعرفنا بروحك أكثر

الخدام على روحه: و الله, أنا نخدم كعامل في طاحونة, حيث يأتينا القمح في شكله الصلب لنحوله الى طحين

الصحفي : - تي هاو حلبة هذا, ملا مصيبة نحكي معاه, نعن بو الخدمة, يا *** العن الشيطان و طول بالك معاه, ركح الأرتيكل و ابعثه بعدين- باهي خويا, أش تعمل أخر في الدنيا

الخدام: نقود في الحوار مع الشباب في الدول المخلفة كيف فرنسا و بريطنا و السويد, باش نصدرولهم تجربتنا الرائدة في

قاطعه الصحفي, و قال: باهي باهي وصلت الفكرة, صحيتك, أنت فخر لتونس – نعن بو الغلبة, واحد كيف هذا جاي يحكي بلوغة نقود في الحوار- يا خويا

الخدام على روحه: نعم سيدي , تفضل

الصحفي: كيفاش تقدم روحك في جملة وحدة؟

الخدام على روحه: ولد حلال و متربي, و عاقل و ما نتبعش الخلايق و أصحاب الفكر المنحرف, و نحب السلم و العيش في سكينة و نحب على

قاطعه الصحفي: وصلت الفكرة, ما تقلقش روحك, أتو نصيغلك جملة معبرة من عندي تخليك تبان مثقف من البريمة – الللية الزرقاء الي نعدي فيها, عملة عملتها في روحي و ماش نقعد طول عمري نادم عليها, أستغفر الله- باهي يا خويا, أش رايك كان تحكيلنا على الحوار و تصدير التجربة الدنمركية, عذرا , التونيسة

الخدام على روحه: و الله سيدي خويا, التجربة اللي تكرمت و حكيتلك عليها بكري شوية هي تجربة رائدة جدا, حيث أنا نقعدو مع بعضنا و نحكيو, و بعد ما نكملو الحديث نتحاورو و نزيدو نقاشو الأفكار , و نشكلو لجنة تشكل لجنة للبت في أمر تشكيل لجة للنظر في الأفكار و تعيين لجة ثانية للتقيهم ما توصلت اليه اللجة الأولى و تحديد الأطر اللي ممكن تقيم فيه اللجة المنبثة من اللجة

الصحفي: باهي باهي, واضحة فكرة اللجان, وبارك الله فيك على هالحوار الهائل و على المواضيع القيمة و تصبح على خير

الخدام على روحه: أكاهوّ؟ تي زيد أسأل شوية؟ علاش تحب تكمل على بكري

الصحفي: لا لباس, سألتك و خذيت اللي حاشتي بيه, شكرا على كرمك و على وقتك

الخدام على روحه: بالله زيد أسأل عشرة و الا خمسطاش سهال أخر, باش الناس تتعرف عليا أكثر

الصحفي: لا سافا, خذيت عليك لمحة تكفي باش الناس تتعرف عليك

الخدام على روحه: تي أش بيك مستعجل, ما تحبش تعرف شنوا كنت نقرأ و الا مع شكون نقعد في القهوة و الا

الصحفي: خويا, بارك الله فيك, و يعطك الصحّة, و ربي يعينك و تصبح على خير

من غدوة, مشاء الصحفي لجريدة بودورو, و مشاء لرئيس التحرير, و هزله الفقرة, و قله: عرفي جبتلك أرتيكل مثماش خوه

قراه سيادة رئيس التحرير, مرة و بعدين قله : صحيتك, هذا أرتيكل من البريمة, الله لله عليك, هاذي هي المواضيع اللي نحبكم تكتبو عليها, بلا قلك حرية أنترنات, و شباب يحب يحرق و احتجاجات على عدم ادراج اسم فلسطين في كتاب رسمي

اللهم اني صائم

2010-08-31T18:34:00.000+02:00

اللهم اني صائم

تقولها وقت تحس بروحك ماش تنطق, ما تسب شخص, ماش تشدّ خناقه ماش تعمل حاجة اللي تخليك بعدين في حل و اربط

اللهم اني صائم, لازم تقولها وقت تلقى عندك بناي و معلم متع مرمة قاعد يبنيلك و يكسرلك كردونة فايونس سوم الميترو متعها 24 دينار, أما وقت يزيد كيسر ثلاثة أخرين وقتها تزيد تستعوذ, و تقول دفع الله ما كان أعظم و تقول : اللهم اني صائم

يزيد يركب الفايونس معوج, و يقلك البلاصة ذويقة, و يزيد يركب الجليز معوج و يزيد يكسرلك الحلقوم متع الصرف الصحي و يزيد يفيقك على الصباح و يقلك الفتورة ماش تزيد 500 دينار, فأقول اللهم اني صائم

تمشي تقضي تشوف الغشة و تقلو للبياع فاش تعمل , يقلك سامحني ... فتقول اللهم اني صائم

تجي تشوف تلقى القفة تتهز في الحومة و يجي شكون يقلك شبيك جابد روحك, وقتها نقول اللهم اني صائم

نمشي نهز الكرهبة و نخرج ترف و تشوف تحديد للسرعة فيه 50 كلم, و تشوف شكون شده الأمن يخطي فيه على السرعة المفرطة, و تجي بحذاك سيارة لحرس المرور و يجري في 80 كلم/س رغم تحديد السرعة , و تقعد بهات كيفاش الساهر على تطبيق القانون يخالف, تقول اللهم اني صائم

تحل التلفزة و تشوف سلعة تخليك تفطر , تسكر و تقول الله اني صائم

تحل الأنترنات و تجيك على خبر كيف هذا :

وقتها تقول : اللهم اني صائم و نحب نقعد صائم... أما كان خلاوني أولاد الحلال

و تمضي الأيام سريعة كالبرق

2010-08-24T15:04:00.001+02:00

و تمضي الأيام سريعة كالبرق

و تمضي الأيام سريعة كالبرق, منذ سنة كنت قد افتتحت هذه المدونة و بدأت التدوين و اليوم أصبح عمر المدونة سنة كاملة

سنة تغير فيها الكثير, من الأفكار و المواقف, البعض تراجعت عنه و الأخر تعدل و العديد ترسخ, سنة لم يعكر صفوها الا مقص الرقيب عمّار 404,الذي أصرّ على قطع الطرق أمامي محاول اغلاق فمي لمّا صرت أحدث بما لم يرقه و مع هذا, فللحديث بقية سواء في هذه المدونة أو في الجديدة

نخبة الخمسة و الستين

2010-08-21T21:37:00.000+02:00

نخبة الخمسة و الستين

حين تلتقي الأمم لتتنافس فان كل أمة تأتي بنخبة عقولها, في مختلف المجلات : اقتصاد, طب, علوم, قادة عسكريين, باحثين

فيأتي كل فرد بما أنجزه و ما قدمه لشعبه و للبشرية, فيكون الحظر هم المنتنافسون و الحكم, يقف كل فرد أما الحشد ليستعرض ما قدّم, فيقولون له أحسنت اذا أحسن العمل, و يشمئزون منه اذا ما أساء التصرف, و يمقتونه اذا ما كان عون على الخطأ, فما بالك اذا شجع عليه؟

في المدة الفارطة قدمت قائمة من خمس و ستين فردا لرئيس الجمهورية طلب للتمديد بعد سنة 2014, في حين أنه دعوة صريحة لمخالفة الدستور, لكن المتأمل في قائمة الخمس و ستين, يجد أنها تحتوي نخبة العقول التونسية في مختلف المجلات, أو الصف الأول ان صحّ التعبير, الصف الأول الذي من المروض أن تقيم بانجزاته البلاد , و به يكون الحكم على حال تونس في المحافل الدولية

فاذا وقف العلماء, و جاء من لم تعقه اعاقته على أن يكون أحد أكثر العقول براعة و ابداع, كحال ستيف هوكين

اللذي أبدع في مجال الفزياء النظرية على مستوى العالم أجمع, تجد أنه لم يقدم طلب لجورج بوش للتمديد رغم أنه الذي قاد الحرب على ما عرف بالارهاب و رغم أنه الذي أطاح بنظام طالبان و رغم أنه الذي جعل يد الشعب الأمريكي على مستودع للنفظ و لم يطالب بجكم كونه بريطانيا أن يغير الدستور لمصلحة الملكة, و لكن اذا جئنا بالسيد محمد الأوسط العياري , نجد أنه يقدم طلب مخالفة الدسور و يوقع على عريضة تجمع فيها اسمه باسم بعض الذين عرفُ بالعهر السياسي و الفنّي و الاعلامي

حين تقف أمام نخبة من العقول و النخب التي يفترض أنها تمثل صفة الصفوة, و ترى فيها ما ينكره المنطق و الأخلاق, و تجد أنها لم تحترم الشعب حين تدعي أنها تتحدث نيابة عنه... تشعر بالخزي و العار لأنهم أبناء بلدك

السادة النخب أصحاب الأسماء الواردة في قائمة الخمسة و الستين, لقد ألمني أن أرى الشيء الذي أقدمتم عليه , و حديثي موجه للعلماء و ليس للبعض المنحطين المذكورين في القائمة, اليوم اني أجد نفسي مشتت محطم, فكيف يأتي من درس حتى اعتبر علامة ميدانه ليقوم بفعل شنيع مثل الذي حصل؟

في وكالة ناسا يوجد مهندس هندي من بين كل عشرة عاملين هناك, فلو قدر الله أن تنتقل ناسا الى بلد لاقدر الله, لما وجدت خير من الهند مستقرا لها, و مع هذا لم أجد من طالب رئيس حكومة هندية بأن يمدد في ولايته بما يخالف القانون

لقد تبين أنكم نخب زائفة, و الأن بدأت مبادرة الألف, أو الصف الثاني من المثقفين, و عن قريب سيبدأ الصفّ الثالث لجمع العشرة ملايين , بأطفالهم و رضعهم و شيوخهم و موتاهم, ان لم يتم استعارة بضعة ملاييين قصد تدعيم المنتوج المحلي و ذلك عبر استخدام الفائض من المناشدين من كل من الصين و كوريا

سحقا لكم من نخب زائفة

ألف و خمسة و ستنين

2010-08-21T19:20:00.000+02:00

ألف و خمسة و ستنين

ألف و خمس و سنين , مهياش حق باكو الحليب , و مهياش حق الكيلو بنانا أو اي من الغلال اللي تزخر بيها الأسواق في رمضان

ألف و خمسة و ستنين تمثل برشا حوايج

حاشا و كلاّ أن تكون تتعلق بالألف و خمسة و ستين من الموقعين على مطلب التمديد لسنة 2014 , رغم أنهم يعرفو كونهم يدعون سيادة رئيس الجمهورية لمخالفة القانون, فهم أصحاب السوء اللي يحبو يغشوه في النصيحة

توّا يجيش أن شخص يقلك خالف القانون و تسمع رأيه؟ أش تسميه؟ القانون وجد ليحترم, أما هوما, يحبو القانون باش يخالف, موش عيب؟ موش عيب أن يدعى سيادة الرئيس باش يخالفه؟

تو هوّا القدوة متعنا , التوانسة اللي يعترفو بالانجزات الكبيرة و أنا متأكد أن سيادته ماش يطفيهم, الألف و خمسية و ستين داعي لمخالفة القانون, و ماش يحاسبهم و موش ماش يسمع كلامهم, لان سيادة الرئيس ميحبش يكون مثال للفئة الضالة و الحائدة على القانون

خاصة الأخ المناضل خميس الخياط اللي كان ديما يهاجم في بلادنا و يشكك في الانجازات و يهاجم في ما سماه "عهر اعلامي و سياسي" , توّا تتوقع من مثله ان تكون نيته صافية وقت يصحح على المطلب هذا؟

معليناش فيهم الألف و خمسة و ستين هذوكم, أما خلينا في الألف و خمسة و ستين متعنا .... و الا نقلكم , توّا معادش بكري , خليني نمشي نشري الخبز قبل ما يوفا من العطار , و ترصيلي نشق فطري على الماء فقط

المخبر

2010-08-20T16:05:00.000+02:00

المخبر

ــ أحمد مطر ــ

http://www.facebook.com/video/video.php?v=112212538819824&ref=mf

عندي كلام رائع لا أستطيع قوله،

أخاف أن يزداد طيني بلة،

لأن أبجديتي،

في رأي حامي عزتي،

لا تحتوي غير حروف العلة ؛

فحيث سرت مخبر يلقي علي ظله،

يلصق بي كالنملة ،

يبحث في حقيبتي ،

يسبح في محبرتي،

يطلع لي في الحلم كل ليلة ،

حتى إذا قبلت يوما طفلتي ،

أشعر أن الدولة

قد وضعت لي مخبرا في القبلة ،

يقيس حجم قبلتي،

يطبع بصمة لها عن شفتي،

يرصد وعي الغفلة ،

حتى إذا ماقلت يوما جملة،

يعلن عن إدانتي، ويطرح الأدلة ،

لا تسخرو مني ، فحتى القبلة

.تعد في أوطاننا حادثة تمس أمن الدولة

حجبت مدونتي

2010-08-20T02:57:00.000+02:00

ضيفي الكريم, تحيّة و بعد

بالأمس كانت هنا مدونتي, لكن مقصّ الرقيب عمّار 404, ثكلته أمّه , لم يجد لكتم أنفاسنا حلا الا أن يحجب مدوناتنا سعيا منه لتكميم الأفواه.. لقد عاث فيها فساد, و حجب بشكل همجي و عشوائي , على خلفية تدوينة بسيطة عن بن قردان

لقد فعلها عمّار غير أسف و لا حزن على ما فعل, فعمار لا يعرف الأسف, و هو الذي تربى على الجور و اغلاق الأفوه بمقصه تارك توقيعه: عمّار مر من هنا, 404

لكن للحديث بقية , في المدونة الجديدة التي انتقلت اليها, بالعنوان التالي

http://hadhaa-ana.blogspot.com/

في أمان الله

"هذا أنا"

رسالة شكر و تقدير من مواطني بن قردان

2010-08-18T13:36:00.000+02:00

رسالة شكر و تقدير من مواطني بن قردان

الى السادة المعلومين للعموم و المجهولين بحكم كثرتهم و بحكم أن المكان لا يتسع لذكر كل الأسامي النيرة و مباركة الوجوه المبراكة اللتي تساهم في التنمية و في استتباب الأمن و في رفع التحديات الكبيرة

الى السادة اللي يدعمونا دائما بالأعداد الغفيرة متع المقسمين على يمين ينحث كل يوم,

الى الذين جعلُ شعارهم : الصدق في القول و الاخلاص في العمل

شكرا على اللي تعملو فيه في بن قردان, شكرا على ضرب الكبار و الصغار , شكرا على المعاملة الانسانية للمعتقلين و على اقتحام البيوت عنوة و على ضرب النساء, و الصغار, شكرا على كل ترويع و تعنيف و ترهيب لللي يحتج على قطع رزقه و رزق عائلته

موش هذا اللي تحبو تسمعوه؟ عبرات الشكر و المساندة و اللوغة المضروبة متعكم؟ يعطيكم الصحّة, حتى هيّا سنة الشباب , و شنوّا قيمته الشاب اذا ما ياكلش على جنبه و يبات في دار خالته؟

في بن قردان, يخرج الشعب للمطالبة بحقه في الحياة, و في بن قردان يمارس التعسف و القمع على اللي يطالب بحقه بشكل سلمي, و بعدين نقولو علاش تتوتر الأوضاع؟ و بعد ما تشوش, وقتها تولي المساعي للتهدئة و ما الى ذلك من الحديث المعسول, أما الدرس لم يستخلص , و ها قد عادت حليمة الى عادتها القديمة

دولة الحديث الفارغ , و التعتيم الاعلامي

حاجة عادية ... حاجة عادية

2010-08-18T05:02:00.001+02:00

حاجة عادية ... حاجة عادية

وقت تسافر, تشوف برشا حوايج جديدة, في أمستردام على سبيل المثال, وقت تكون تحوس تصادف محلات عندها فترينة, في الفترينة تلقى سلعة , من بعيد تعيطلك, تضحكلك و تقلك تحبش؟

في الواقع في الفترينات هذه, تلقى ثما مومسات, في المحلات المجودة في قلب بعض العواصم الغربية تستغل الأسلوب هذا للاغراء, و نفس الشيء تقريبا موجود في بلجيكا ... لكن الحمد لله انك وقت ترجع لبلادك تلقاك مرتاح ان المنظر هذا ما تشوفوش

يتعدى الوقت و يجي رمضان ... و يبدأ شهر العبادة أو هكذا كان يسمى الى عهد قريب , لكن في القرن الحادي و العشرين, يتحول الى شهر الفرجة و المسلسلات, كل قناة تعرف انه من أكثر المواسم مردودية ... كل واحد يعرف أش يسعده, تحل التلفزة الوطنية , وقت تقول التلفزة الوطنية فانك تحكي على قناة يصرف عليها دافعُ الضرائب, حك جيابك

تقعد قدام تونس رقعة و تبدأ تتفرج مع العائلة, و تسب روحك على العملة

و بعد ما تحلها تشوف الفظائع, تي أش فيها؟ بنية تجي و يتم التعريف بيها كبائعة هواء, أش فيها؟ ماعندهاش الحق تمارس التجارة؟ توّا البنية عملت العيب؟ تي هوّا سامي الفهري يقول نورمال, أش بيها؟ موش نورمال؟

كيف البنية الحلوة اللي يجيبوها زوز أولاد للبرتمان باش يعديو سهرة في طاعة الله, أش فيها؟ تي خوات, مبيناتهم شيء, نيتهم صافية, أش فيها؟

و الا اذا راجل يعمل صحبة على مرته, أش فيها؟ عيب؟ حرام؟ و الا , سيب علينا من لوغة قال الله و قال الرسول, على خاطر شيوخ الفضائيات التونسية , ميحبوش يخوضو في الحكياة, أش لازم يتحككو, لان الحديث متع قال الله تعالى , ما يمشي كان مع العامة, رغم أن ربي ما يميزش بين العامة و الخاصة, و بين الغني و الفقير, أما هل يفسد النفاق الصيام؟

تو انت تحل التلفزة , و تشوف عينة راقية من الكادحات في صمت, بائعة أكسيجان, تتعطر, و تتجمل, و تتزين, و تحب تفتنك بحسنها, أش فيها؟ موش نورمال؟ عادي, تي خليك اسبري , شبيك متعصب؟ و متطرف و ما الى ذلك من اللوغة الزبلة متعه الشلايك اللي غزات التلفزة الوطنية, حلوة اللقطة ان فلوسي اللي ندفع فيها تمشي في تشجيع العهر الاعلامي التونسي... كيف كل مواطن يخلص في الفاتورة متع الستاج

توا بالأمس وقت قال ثقيل الظل , العبدلي عدة نكات سخيفة و جارحة, قالو نورمال , و اليوم نفس الشعار : نورمال

جماعة النورمال هاذم, بالمجد يحكيو؟ توا عادي باش شخص يصوحب على مرته و يمارس مع عشيقته الجنس؟ ملا في عائلاتهم نورمال؟ بوهم مصوحب؟ أمهم مصوحبة؟ أخته مصوحبة على راجلها؟ و الا ما يرضاوش؟ و عادي؟

هذا الكل في كفة, و مشهد مضاجعة على الملأ في كفة, قول علينا في فيلم بورنو, قال شنوّا عادي

عادي برشا, انك تشوف شكون موش متربي, و عادي برشا انك تشوف شكون عامل فيها قافز و عادي برشا انك تشوف شكون يحب يخلي الناس تغزله, و من هذا المنطلق يعمل المستحيل باش الناس تعرفه, ثما اللي يعمل العجب, و ثما اللي يبيع, و يقبل باش يطيح و يشلح, منيش نستهزئ , أما نقدر في دور ممثلة شابة قامت في سبيل الفنّ بلعب دور مومس, تي شبيها المومس , موش محترمة؟ تو اللي يخدم و يتعب, فيها عيب؟ تي المومس تخلص في الأداء للدولة, و تلوم عليها؟ تي المومس اللي تباع و تشترى ... و الا سيب علينا من تباع و تشترى و نعتبروها من بين اللي يقدم في خدمات للمجتمع و للشعب و الشباب

توّا للدرجة هذه يوصل العبث؟ لمحاولة ان الثقافة متهنا تتحول الى خرقة بالية, قال شنوّا الحداثة, و اعلام حرّ؟ الحرية هذه ما توجد الا في ثقافة الجزء الأسفل من الحزام؟ الى درجة أنك تشوف محاولة تمرير للأخلاق المنحطة في قناة وطنية و معها لوغة عادي, و هذا صحيح و موجود, ممكن في ديارهم , منلومش عليهم, اذا يوصفو حالهم, أما موش في ديار التونسة الكلّ, لأن المومسات و أشباه الرجال اللي داهم في أعضائهم الذكرية , ما هم الا فئة شاذة ... جمعية أحباء السراول الطايحة

الفئة هذه اللي تتصور انها الصورة الطبيعية, و انها الصورة المثلى و الصورة الصحيحة لما يجب أن يكون عليه المجتمع التونسي , تتصور أنها على الصراط المستقيم, تتصور انها الفئة اللي تمشي على الحقّ , الشيء اللي يفسر وجود رؤس أموال تونسية مستثمرة في قنوات اباحية موجهة للعالم العربي و لاوربا, فالمهم هو المال المتدفق الى جيوبهم ... ما يغركش لوغة الحرية و لوغة ان اللي تشوف فيه في المسلسل موش غريب , لكن في الوقاع هذا الكل يدخل في البحث عن الأموال و لو كلف الأمر ان يغمر المجتمع بالرذيلة

بعد ما يجي في كل فترة مسلسل و الا برنامج قذر , ثما أصوات عفنة تتخبى, أصوات أشباه المثقفين و العلماء التافهين, أصوات حقيرة, لا تتردد في نقد زيارة القرضاوي قال شنوا انه ماش يمس المكاسب و يهدد المجتمع و في نفس الوقت أصابها الخرس وقت جات قدام مسلسل عفن, أصوات لا تتردد في محاولة اجتثاث تونس من محيطها و المس بثقافتها , زمرة قذرة, تتمحور أقصى تحدي يحبو يرفعوه في بناء مركب ثقافي شبيه بعبد الله قشّ في كل مدينة و قرية و دوار في تونس و الحاقه ببار, و تخصيص كعبة بيرا لكل مواطن, و في نفس الوقت تجد شيوخ الفضيلة و الخير اللي يختارو السكوت في مواضيع كيف هذه, و يؤثر تجنب طرح الموضوع, و الاكتفاء بوعض العامة و ارشادهم في كيفية الوضوء و حكم انك تشم التابل و الكروية وقت تمشي لحنوت الطحان , ملاّ وينك؟ تحبه يتحكك على الزرب؟

أحس بالغربة في موطني

2010-08-06T10:58:00.000+02:00

أحس بالغربة في موطني

أحس بالغربة , أحس بأني الغريب بين أهلي و أصحابي

هل رأيت اذا كنت في متسع من الأرض و لم يتسع لك؟ أرأيت اذا اطرقت للسماء و وددت لو كنت طير لتحلق؟ حتى اذا ما مت يوم كنت قد بلغت في ما حييت الأفق ... الغربة شديدة, فحين لا تشعر بحلاوة بلادك و حين يأتي من السياح من ينشد فيها أشعار تجد أن في الأمر شيء غريب ... ضاقت بي الأرض بما رحبت و ضاقت بي البلاد بما اتسعت, فلم أعد أجد فيها شيء يفرج همّي و لا يشرح صدري ... أشعر بالغربة في وطني, ينتابني ذلك الشعور كلما رأيت تعسف أو سمعت عن ظلم ... هل ضاقت بك الأرض حتى صرت تبحث عن وطن مثلي؟ هل أتاك من الكرب ما حير مضجعك مثلي؟ هل علمت كيف يكون الظلم, و كيف يتعلل الظالمون بأنهم مأمورون ؟

غريب أمرهم, و ان كنت لا أعلم من الغريب أنا أم همّ, غريب أن لا تجد في "بلدك" ما يجده غيرك في غير أوطانهم, و غريب من لم يسر على خطى السواد الأعظم في هذا البلد, أحس بالغربة كلما رأيت ظلم أو تعسف, أحس بأني سأبكي الدم على وطني, وطني؟ و ما يكون من وطن اذا لم يتسع لأحلامي؟ اذا لم يتسع لطموحي؟ اذا كنت لا تجد فيه راحتك, اذا كنت ترى أن الأجنبي يتمتع بحقوق أفضل منك, اذا علمت أن لا حق لك الا في الهواء و في الانحناء تعبيرا على الامتنان و الولاء, و يا ليته كان ولاء للوطن, و الأكبر من هذا أن من يدعي الوطنية هم أشد الناس تمايل مع الريح حيث هبت ... هل أجد لهذه الغربة من مخرج غير الرحيل؟

أحس بالغربة حيث ما ذهبت, في البيت, في الشارع, في الجامعة, في مختبر البحث العلمي, فالقاسم المشترك أنك تنسف فيها أحلامك ... تنسف نسفا فتصير هباء منثورا ... لتذروه الرياح

ما الوطن اذا لم تجد فيها حقك؟ ما الوطن اذا لم ترى فيه للحق موطئ قدم؟ ما الوطن اذا لم ترى فيه مستقبل مشرق؟ ما الوطن اذا لم تجد فيه مبتغاك؟ ما لم تحس فيه بالطمأنينة , بالراحة, بكل ما قد ما قد يجعلك تحس بأنك انسان, بانك تستحق الحياة لأجله, أو لنقل بما قد يجعلك تحس بأنك حيّ ترزق ... فشتان بين حياة الكريم و حياة الذليل

ثم يأتي من يحدث عن الخروج من التخلف و الانحطاط, و الرقي و التقدم و ما الى ذلك من حديث تطرب له الأذن, و لكنك ترى على الأرض ما تنكره من أفعالهم, فهم كالذي جعل أرضه منبت لما طاب من خيرات و أطلق فيها من النعام ما يعوث فيها فساد و اذا حل موسم القطاف قال : أين ما زرعت و بذلت لأجله المال و الجهد؟

غريب في وطني, و لا أجد لهذه الغربة من مخرج... وطني ما بك ؟ ما الذي حصل لك فصرت لا تتسع لي و لا لما في صدري؟

يا موطن بذل فيه الغالي و الرخيص, ما الذي أصابك؟

موطني, موطني, موطني... ألا أجد فيك متسع لحلم و طير ؟

الى السيد النائب الموقر

2010-07-30T23:34:00.000+02:00

الى السيد النائب الموقر

وقت كنت صغير , كثير ما كنت نصدم برد " اسكت , ما تدخلش في حديث الكبار" أو " نقص من الحسّ" خاصة اذا كنت نحرج شخص من الكبار بسؤال ما يلقاش كيفاش يجاوب عليه, أو اذا ما أحرجته بتعليق لم يخطر على باله

في دروس التربية المدنية اللي كان يكثر فيها الحديث عن القانون و الحقوق و الواجبات, كان الصراع يحتدم و قلّ أن وجدت أستاذ قادر على الردّ من غير ما يخاف في تعليقه, و من بينهم أستاذ كان يقلي أن أسئلتي محرجة و أني أرتقي مرتق صعب مع بعض اللي يقريو فيّا, السبب أني كنت في بعض الأحيان أسأل عن أشياء بدت للبعض من المحرمات و بدت لي من المثيرات للشبهات فاخترت السؤال سبيل للبحث عن جواب

و في الجامعة, تدرس مادة كاملة, اسمها "حقوق انسان", شيء جميل أنك تعرف حقوقك و واجباتك, لكن لقيتها لا تغني و لا تسمي من جوع, علاش يحكلي على الاعلان العالمي لحقوق الانسان؟ أش نعمل بيه؟ وقتها سألت استاذي: شنوّا اللي ماش تزيدهولي المادة هذه؟

كان ردّه أني لازم نكون واعي بحقوق الانسان

" واعي؟" ... كيفاش واعي؟ ما نعرفش تعريف البعض للوعي, أما اللي نشوف فيه أن الوعي عندهم هوّ انه تسكر فمّك, و تقول الله يبارك و اذا لزم تصقف

هل الوعي يكون في الحجب الغير مقنن و بذل الأموال

هذا في كفة و الباقي في كفة, أما خلينا نرجعو للوعي , توا اللي يجي يحب يتظاهر و يحب يعبر على رأيه , موش تكريس للحقوق؟ و حق لنا أن نعبر عن ما نؤمن بيه؟

باهي نقبلو فكرة ان لغة الاحتجاج موش متعنا والا تشوف المتراك ترقص على جسدك على اعتبار انها الحلّ الامثل للحوار بين الأمن و الشعب, خاصة بعد أن كثرت الفيدوات اللي تصور الترحاب الحار اللي يتلقاه المواطنين من طرف القائمين على القانون

و مع هذا, تلقى شكون يختار أساليب أكثر تحظر على اعتبار ان الحوار هو السبيل, و يمشي السيد الكريم و يكتب رسالة الى نائب, و يتعب و يبدعث أكثر من جواب و يدفع حقهم و يقول التعب موش مشكلة و لا حتى الفلوس , المهم النائب الموقر اللي حفيت قدماه في المرور على السادة اللي بيدهم دفعه الى المنصب أو ابقائه حيث هوّا بين العامة, و بينهم المختنبين الكرام اللي كل واحد فيهم يعطيه صوته, و النهار اللي تستحقه يولي النائب موش موجود, تي وينك يا باشا؟

نكرت فينا؟ و الا توا معادش نهموك؟

صحى ليك, انك في عالم ما يحابش المسهولين السياسين اللي في منصبك على وعودهم الانتخابية ... في كندا صارت مرة أن أهلي منطقة, طالبو المرشح متعهم باش يتدخل لمهاجر من أمريكا الجنوبية باش يستقر في كندا لان في حالة انه رجع ممكن حياته تهدد , صحيح ما وصلناش للحالة هذه, أما بصراحة النائب اللي ما يحملش هم المواطن السماح فيه, و توا بعد ما عملنا برلمان للشباب, هل نتوقع أن نرى فيهم من يحمل عنّا السؤال الى المسؤلين؟

منحملوهمش أكثر من طاقتهم, ميزالو صغار و ما كبروش, أما اللي يشوف تطلوعاتهم, يقول هاذم ما يطالبو باستجواب وزير الاتصالات, زعمة تصير؟ تي الكبار معملوهاش و الصغار ماش يعملوها؟

منتصورش, تي أخر مرة كانت فيه الحكومة الموقرة أمام مجلس النواب, طلب رئيسه من النواب التقليق من المقدمات الجاهزة, أي نائب يجي يحكي مع وزير, يبدأ : انت الأول و الأخر و خير في من كان قبل و لما جئت صلح حال إدارتك

هل نتوقع من نائب يحكي مع وزير بالاسلوب هذا, يطالب باستجواب وزير؟ صعيبة برشا, أو انها من المستحيلات

هل يوجد من النواب من هو قادر على مخاطبة وزير هكّا؟

هذا مثال من مصر

المصدر
http://www.facebook.com/video/video.php?v=197444699747

قدّاش عنده الفيديو هذا منشور في الفايس بوك؟ مثماش نائب في البرلمان طلب بالاستفسار على اللي صاير ؟

المصدر

http://www.facebook.com/video/video.php?v=1207849236475

اليوم منيش ماش نطالب باستجواب وزير أو حجب الثيقة عليه, اللي هيّا من المستحيلات أن يطيح البرلمان به, أما نطالب باستجواب ممثلي الشعب اللي تكاسلُ عن الإيفاء بمتطلبات مناصبهم ... أما لسوء الحظ , النواب ما نشوفوهم الا قبل الحملات الانتخابية و في التلفزة, بالطبيعة للي يتفرج على تونس 7

على الهامش: وين وصل جوابي؟ فين طيشتوه ؟

شعب يهوى النكد و الفضائح و النفاق

2010-07-23T17:03:00.000+02:00

شعب يهوى النكد و الفضائح و النفاق

تكون عايش في رحمة ربّي يهبط ليك شكون من المحيط يكرهك في عيشتك, موش في حشان الركايب أما النكدّ متعهم عنده أشكال مختلفة... منيش نحكي على بعض الأطراف اللي نصبت أنفسها مخبرين علينا في البلوج سفار التونسي و هبطت تكتب في التقارير و عاملة محاكم للتفتيش ...أما نحكي على أشكال أخرى

كان و كانت... شاب و شابة, أولاد عم, بعد ما كمل الشاب قرايته و بناء داره قرر أنه يستقر.. و يتزوج بنت عمته, هو من الصغرى حاطط عليها عينه و عاجبته و اليوم جاء الوقت باش يتوكل على ربّي و يلم ساقيه, خطبها و عرس و قعدو يستناو في الصغار.. و طولت المدة, لين شكّ وان ثما مشكلة, ماشو للطبيب و تبين أن أحدهم يعاني عقم. و بدأ الأمر يعكر صفو العلاقة بيناتهم الى ان انتها بالطلاق .. و كل واحد مشاء في ثنية

جمعة لتالي , جاء شخص يسأل فيّا

سي الشباب: ياخي المشكلة منه و الا منها؟

هذا أنا: شنوّا؟

سي الشباب: لا, نسأل فيك, المشكلة فيه و الا فيها؟

هذا أنا: و شنوّ مدخل والديك في الحكاية؟

سي الشباب: نحب نعرف

يحب يعرف , و يحس بالنشوة ... بحكم أنه فاهم

مشيت و قعدت نلعن في النهار الكلب... الأشكال هذه نكره ريحتها, لانها من النوع اللي ينكد و ما يفهمش حدوده... أشكال ما تفهمش أن ثمّا حوايج ما تهمهاش و ما عندهاش الحقّ باش تعرف حاجة ما تهمهاش

موش الحالة الوحيدة اللي نعرفها, أما اذا تشوف قدّاش يعاني شاب تزوج حديث وتأخر شوية جيبان الصغار ... لأن جرات العادة عنّا ان اللي يعرس لازم بعد 9 شهور من ليلة الدخلة يجيب صغير ... و يكون الانجاز متاعه متمثل في اثبات خصوبته

المشكلة تكبر وقت يولي الخلق المريض يفدد في غيره و يوقف الشاب هذا في الشارع و يسأله: المشكلة منّك و الا منها؟

تقول ياخي أش مدخّلهم؟ أش يهمهم؟ أش ينفع ماذا عرفو شكون اللي عنده المشكلة؟ أم لا, أش قيمة حياتهم الفشالة على كل المقاييس اذا ملقاش باش يحكي في القهوة وقت يجب سيرت فلان و فلانة و يعمل فيها قافز و عالم عصره و علامة زمانه و يصبلك الأخبار و أسرار الديار و يزيد يجيبلك الدليل القاطع و البرهان الساطع بأن فلان و فلانة موش لاباس

شيء يفدد أنك تشوف شكون يعاني لانه ما ينجمش يتمتع بنعمة أن يكون أب أو أم

و يزيد عليه شعب مريض من النوع هذا ...و بعد كل هذا يجي يحكي ماك و يقلك " أستغفر الله" ... لازم يستغفر , موش مرّة و موش اثنين, برشا, لان الشتل هذه اللي تخوض في الأعراض و متهمهاش و اللي تدعي التقوى ما هي الا إذاعات متنقلة , لا تأتمنها على شيء ... اذا اليوم تقله ما تعاودش , ممكن في عشيتها تلقى روحك مفضوح و بالطبيعة ما تحبش في عرضها... انه شعب يهوى النكد و الفضائح و النفاق... الا ما رحم ربّك